Oromummaa dhugaan kalee manaa baanee
Diinaan jilbiiffannuun qabsaa'uuf murannee
Hadhaa fi cinqii meeqa dhandhamannee
Har'a guyyaa keessaa maaliif jijjiiramnee?
Irbuu kaleessaa san dhiiroo ni dagannee?
Qabsoo gootoonni itti wareegaman,
Barataaf barsiisaan itti ajjeefaman,
Hayyuu fi wallisaan hidhattiin roorifaman,
Sabaaf maal qoodaniit qabsoo tana bocolan?
Qabsoo saba bal'aa kan waggaa soddomaa
Kaayyoon isii sirrii maqaanis tokkumaa
Hawaasni hin qabu shakkiis tahe mama
Hawwiin teenya guddoon arguu bilisummaa
Man-tokko jaaraa citaa maaf wal saama?
Waluu numa dhabu arrabaaf ilkeenii
Yoo wal dhabanis furuu nagayaanii
Wal dhabbii uumameef maaluma furmaanni?
Dura beekuu qabu gubbarraa kaasanii
Bu’uurri wal dhabbii maaluma rakkinni?
Rakkoo jirtu furuu maaliif dadhabanii?
Qabsoo waggaa dheeraa duubatti harkisuu,
Iccitii dhaabaa diinatti geessuu,
Hayyuuf qabsaawaa maqaa xureessuu,
Aangoof bololanii dhaaba faalleessuu,
Kun maaliif tahe maaliif nu rakkisuu?
Tan bololaniif hoo tami aangoon tunii?
Wilii hin bilisoomnee,maaliif jarjaranii?
Jaluma deemuuf abbaa godhatanii
Qabsoon abbaan qabdu qabsaawaa abbaanii.
Akkas tahuu kana maaliif dagatanii?
Kan qabsaawaniif diina fonqolchuudha
Bilisummaa dhugaa harakatti galfachuudha
Ifiin if bulchinee Oromummaan boonuudha
Ifiif wal nyaachuun hoo dhiiroo mee sirriidhaa?
Yaa kan of nyaattee eenyummaa kee gurgurtu,
Kan diinatti galtee achirraa geerartu,
Yaa kan alagaatti galuuf ammallee hamiltu,
Irbuu kalee seente kan dagattu,
Kutaa fi gandaan kan addaan nu baaftu,
Yaa jeeyxu yaa saba rakkiftuu
Haqni Oromootaa si haa gaafatu
Lafeen wareegamtootaa qoree taatee si haa waraantu!
Dhiigni gootoowwanii garba ta'ee si haa nyaatu!
Kanneen qabsotti jirtan isin qabsaahoonni,
Dhugaaf manaa baatan lubbuu kannitanii
Summii isin seenteef hamileen cabinii
Wabii bilisummaa isiniin boonanii,
Qabsoo itti fufi dhihotti galiinii!
Qabsoo itti fufi dhihotti galiinii!
Najiib
Marsimoonaa@hotmail.com
Comments (6)
Print
Tell friend
Top
