Mallattoo nagaakoo yaa baattuu nageenyaa
Quba qabdaa laataa nu siyaaduu keenyaa
Sibirroota birootti makamtemoo laataa?
Waadaa fuutee baate isa guyyaa qaataa?
Garaa nama nyaattaa qalbii keenya hattee
Seenaa waliin qabna kanaaf numararte
Gonfoo walqixxummaa madaallii qajeelaa
Hawwinee dheebonnee yaadaan sikajeellaa.
Qalbiin hunkuramnee hafuuraa ciccinnee
Waliin dudubbannee abdiiyyuu kutannee
Adurreen adalli wicii baay’ee fixxe
Dukkanaan da’attee fuutee boollaan lixee
Arraagessi budaan innichi adda booqaa
Adalicha faana tokkoomuuf carraaqa
Isaan lamaaniyyuu dhiiga xuuxaa ooluu
Qabeenyaa Gugeerratti yeroo hundaa walloluu
Risaafi ruumuichi Joobirris kaateetuu garaa Waaqaa keessa
Cabsee alanfatee balleessuu barbaadee gayyaafatee qeensaa
Lukkuun jinnii kaatee isheen jibbisiistuun ilma namaaf diinaa
Huummoon raqa nyaattuu ilbisa bosonaa hundumashee beeknaa
Simbirri daaloteen gamanaa fooriccee nagaa booressitee
Oduu hololaafi isa madda hinqabne walitti odeessitee
Hurunguun bosona keessaa ol dachaatee maasii keessa guuttee
Simbirri halkanii dukkanaan da’attee adalaaf wallaatte
Cirriin saawwan keenya ittuma ejjettee dhiiga isaanii xuuxxu
Warreen nuguggubdu nurraan galagaltuu ykn nurraa hincittuu?
Jetteetu gugeenkoo gugeen miilla calii dubbatti gaararraa
Dhufunshee dirqama faajjii fannifattee teessee adda leencaarraa
Gugeen yoomuma dhufti faajii bilisummaa ciniintee baadhattee
Ijoolleen kee marti dhufaatiikee dhaggeefatu gurri dhadhaabbatee!
Qalbii cabe suphuuf kutannoon hojjettee
Ilbiisota mara boollatti ukkaamsitee kaanis injifattee
Simbirroon dhokattuun maqaanshee jibbame mormi jalli diimaa
Magariisa uffattee odaan faayamteetu labsii nagaa himaa
Yaadaan burjaaja’aa qalbiin namiidhameen hubamee keessikoo
Qara ilaalaan hafamoo dafteetu naadhuftaa bareedduu Gugeekoo!!
***///***
Gugee koo gugeekoo gugee lammii keenyaa,
Dafiitii nuuf koottu dheeboonnee si eegnaa,
Baay’ee si dheeboonnee dheebuu nama maraa,
Si hin argiinaan du’aa addunyaa kanarraa?,
***///***
Nagaan boqonnaakee addunyaa danboobsaa
Eebbi sirraa burqu hinqabuum lakkoofsa
Kanaafuu naaf dafi maaloo an muddamee
Erga duriin jooraam hinuma naaf gamee
Akkakee kaachuudhaaf samii Waaqaa keessaa
Giidoo bututaakoo humna nadaangessaa
Dheebuu cimaan qabaam beekuuf argamakoo
Si eegaanoo jiraa yoom dhuftaa Gugeekoo?
****/////*****
naanjedhaniim….
Gugeen ati eeguu isheen bara sanaa,
Yaadaan gadi hin teenye hin dhiisni maassana,
Lakki hindagatne waadaa fuutee baate,
Addunyaatti dhugaa jiru himuuf beellama itti taate
Gargaarsas nifeeti kan keessaa fi alaa
Waanta salphaa miti jireenyi halaalaa
Gugittii kaleessaa haadha wucii hoomaa
Furmaanni hin argamu eeguu qofaan homaa
Wucooliinshee kitilaan har’a guddatanii
Dhufaatii haadhasaanii kanneen eeggatani
Akka daftee dhuftuuf yoo ariifatani,
Galma sirreessanii haala haamijeessani
Yoos dafee nita’a dhumaatiin barichaa,
Abdii hin kutatiin yaa dhala Oromtichaa,
ammas naan jedhani…….
Dhugaadha nan fayyee aannanuman dhugee
Maalin dubbiseeree Akka harma haadhaan itti jedhe luugee….
Beekantu akkas godhee natti kaasee Gugee
Dhaggeeffattee laataa maaloo Gugeen keenyaa.
Abdi irraa qabna kanaaf karaa eegna.
Dhaga’uu baattuyyuu garaahoo wal beekna.
Barrisii nuuf kottu maaloo Gugee keennaa!
Atis nu jiraadhuu Beekan yaa beekaa koo hayyuu bara qubee
Dubbiin Gugee kanaa hundaa garaa gubee
Abdiidhumaan eegna gaaf tokko yoo dhufeeee.
Beekan Gulummaa Irranaa Mardaasaa, 2014
***///****
*** KUN BU’AA SUKKUUMMII SAMMUU KEESSANII DABALATEETU!!***
