INNAA LILLAAHI WA INNAA ILEEYHI RAAJI’UUN

Anis Biyyaan Qabaa

Tan Uumaan Badhaatuu…..

Qabsoo Ummata Oromoo keessatti waan Alii Birraan Gumaache himanii fixuun nama dhiba.

Eenyumtuu gara irraa dhufetti deebi’uun waan hin oolleef gara hin oolamne nurraa deeme.

Artist Alii Birraa yeroo dheeraaf dhibamee, Magaalaa Adaamaa Hospitaala Adaamaa Jeneraalitti wal’aanamaa erga tureen booda, har’a lubbuun darbuun isaa mirkanaa’eera

Dr. Kabajaa Artist Alii Birraa, Umurii ijoollummaa irraa eegalee nama ganna 50 oliif guddina aartii Oromootiif shoora hundaa olii nama bahedha. Kana malees Aartiidhaan dhaloota dammaqsuun nama falmaa bilisummaa Ummanni Oromoo bifa garaagaraan taasisaa ture keessatti qooda seenaan hin daganne gumaachedha.

Gaaddisa Aartii Oromoo, Falmaa bilisummaa fi Walqixxummaa dhala nama kan tahe Dr. Kabajaa Artist Alii Birraa du’aan of biraa dhabuu keenyaan gadda nutti dhagahame ibsaa, Maatii, Firoota, Jaallattootaa fi Dinqisiifattootaa isaa, akkasumas Ummata Oromoo maraaf jajjabina hawwina.